Skuadra kurbinase, që këtë sezon është një kandidate serioze për një kategori më lart, e ka nisur në mënyrën më të mirë kampionatin. Laçianët kanë thyer një “tabu” që në javën e parë, atë të fitoreve jashtë fushe. Kujtojmë që gjatë sezoneve të fundit Laçi ka vuajtur shumë nga “sëmundja” e rezultateve jo të mira në transfertë. Në këtë sens, fitorja 1-0 në Librazhd me Sopotin është një ogur i mirë për realizimin e objektivit. Të besuarit e trajnerit Ilir Gjyla, falë një goli të lezhjanit Kreshnik Ivanaj, janë kthyer me 3 pikë shumë të rëndësishme nga Librazhdi, pasi ato ndikojnë shumë në moralin e futbollistëve. Pra, ka qenë një fitore me shumë vlera për Laçin ajo në fushën e Sopotit, që është një ekip i fortë. Suksesi në transfertë e rendit Laçin përkrah pretendentëve të tjerë për në superligë, siç janë Skënderbeu, Kastrioti, Luftëtari dhe Burreli. Gjithsesi, do të jenë javët në vazhdim që do të evidentojnë skuadrat më të forta. Laçianët kanë filluar të përgatiten për ndeshjen e radhës, atë me Adën në fushën e tyre. Në pamje të parë duket një ndeshje e lehtë, por kurbinasit nuk duan t’i bëjnë asnjë nënvlerësim, pasi humbja e ndonjë pike do të zbehte fitoren e javës së parë. Trajneri Gjyla duket se ka ndërtuar një skuadër të denjë për të pretenduar superligën, pasi ka në përbërje lojtarë me përvojë, të cilët dinë t’i zgjidhin situatat e vështira. Tani vëmendja është te ndeshja me Adën, ku vlen vetëm fitorja.